alam alfan waladb
زمانا غير زمانكم. بقلم الشاعر وسيم نبيل. عالم الفن والأدب .
حتى العبيط مش سايبنه في حاله
فرضوا الضحكة وقالوا وماله
في الشوارع كلام الناس زي ضل
دا قال ودا اتعمل ودا فيه غل
وكل واحد ماشي راسه منكوسة
بيعد فتافيت تراب مش مكنوسة
ورامي وراه ضهره حمل تقيل
يهد جبل ولا زفّة عروسة
مين فينا مش ماسك سيرة التاني
ومين فينا مبيحبش للتاني الخير
كله واحد جواه طمعه وإنه أناني
أصل العين دايمًا بتكره الغير
سألوا راجل كبير: زمانا ولا زمنكم؟
رد وقال: زمانا غير زمانكم
زمنا كانت اللقمة حاف تشبع
واللحاف كان للأحباب بيجمع
كانت الطبلية من الخير تشيل
كان وقت الحزن كله بيدمع
كان جوه البيوت ساقع
وكانت القلوب صافية ونقية
وكان الغريب من السفر راجع
يتفتحله ألف باب مرحبية
كانت الشمس بتدفي متحرقش
كانت الضحكة مرسومة مبتبطلش
كان الكل بيحب بعضه من جوه
كانت كوبية الشاي طعمها في أي بيت ميفرقش
اتعكس الزمن اتغيرت الناس
كله بيدفع التمن من قلة الإحساس
معدش في جوانا إخلاص
بقينا بنقول ياريت نرجع زي زمان
نكون فعلًا ناس
